گیلکˇ نتأج

شما میتوانید از این تگهای html استفاده کنید:

یا ، یا ، ، یا ، ^{، _،}

، ،

،
																				
،
																				
،
																				
،
																					،
																						،
																							

																							

																						
																					
																				

																			

عيلم ؤ دأنش ؤ ايجتمأعي تغييرأن ˇ سۊرعت, يأ رۊز به رۊز ايطلأعأت ˇ زييأدأ بؤستن ؤ تأزه تکنؤلؤژي-يأن ˇ أمؤن, بأعيث بؤبؤسته کي پيشرفته جأمعه-أن ˇ آمۊزش پرورش, ويشتر, خلأقييتأ دربند بيبيد ؤ خلأق ˇ آدمأن ˇ آمؤختن ˇ ره حق ˇ سأى بۊکۊنيد.

أ رۊزأن خلأقييتأ آمؤجأنئن, ويشتر ˇ مدرسه-أن ˇ دۊرۊن بۊخۊصۊص دبستأن ؤ پيش-دبستأن, ايتأ مۊهيم ˇ آمۊزشي موأد به حيسأب أيه. أ دأب ˇ دۊرۊن, آمؤختن-کسأنأ آمؤجيدي کي ذهن ˇ کؤنه دأبأن ؤ کؤنه قأليبأن ؤ اۊ فيکرأني کي أشأن ˇ ذهن ˇ دۊرۊن جأ بيگيفته جأ, دۊرأ بد ؤ تأزه دأبأنأ دربند ببد ¹.

أسأ دأنشمندأن, حتتأ اۊ جوأنأني کي آمؤختن ˇ ايستعدأدأ دأريدي رئم, کي مأمۊلن خرجم زييأد دأره, « دئه ضريب ˇ هۊشي-يأ وألنگأ دأد ؤ اۊشأني کي ويشتر خلأقييت دأريدي-يأ دربنديدي ². » اۊشأن اعتقأد دأريدي کي خلأقييت ˇ ره وأسي ايسري توأنأيي-يأن, هوش ˇ مأنستن دأشتن.

ايتأ خؤرم جأجيگأ آمأدأ کۊنيد, پئر ؤ مأرأن ؤ معلمأن, خلأقييت ؤ خلأق ˇ زأکأن ˇ خۊصۊصييتأن ˇ أرزشأ اۊشأنأ بيگيد ؤ خلأقييت ˇ وأج أوردن ˇ أرزشأ اۊشأنأ بأمؤجيد.

هۊنر ؤ مييأن رشته-يي درسأنأ أهمييت دأن تأنه ايتأ پيلدأنه کأر ˇ پيش-گب ببه کي بتأنيم ايتأ خلأق ˇ نتأج بدأريم. ايتأ کأرأني کي تأنه خأيلي رأحت, پئر ؤ مأرأن يأ معلمأن, آمۊزشي جأجيگأئأن ˇ دۊرۊن ايجرأ بۊکۊنيد نقل گؤفتنه کي تأنه ايتأ خلأق ˇ فعألييتم ببه. کأرشنأسأن اعتقأد دأريدي کي « زأى پئن شيش سألگي دۊرۊن, نقلأنأ ديل دٚوٚده کي اۊن ˇ پسي دئه نوأ نقلأن ؤ أفسأنه-أن ؤ دأستأنأنأ اۊن ˇ جأ جيگيفتن ³. »

روأنشنأسأن هرجۊر کي بتأنيد, دأستأن خأندن ؤ نقل گؤفتن ˇ مرأ, زأکأنأ بأل زنيدي؛ بعضي-يأن زأکأن ˇ احسأسأن ˇ ايشنأختن ˇ ره, چۊنکي تأنيد اۊن ˇ کرد ˇ کأر ؤ روأن ˇ مۊشکيلأنأ درمأن بۊکۊنيد, بعضي-يأنم أن ˇ وأسي کي آمۊزشي موأدأ مدرسه دۊرۊن پۊرترأ کۊنيد ؤ درس, زأک ˇ ديلأ ويشتر بيگيره ؤ بعضي-يأنم زأکأن ˇ خلأقييت ˇ وأج أوردن ˇ وأسي.

أولي جرگه ره نقل گؤفتن ايتأ وسيله-يه کي اۊن ˇ مرأ تأنيدي زأکأن ˇ تجرۊبه-أن ؤ احسأسي حألتأنأ درک بۊکۊنيد ؛ مثن روأنشنأس, نقأشي کشئن ؤ دأستأن گؤفتن ؤ نقل-خأني دۊرۊن, زأکأ کۊمک کۊنه. زأک ˇ نقل گؤفتن ˇ پسي, روأنشنأس هۊ نقلأ ايجۊر ديگه ؤ بئتر وأگۊيأ کۊنه ؤ أتؤيي, اۊنأ کۊمک کۊنه کي خۊ مۊشکيلأن ˇ ره چن جۊر رأى ˇ حل بييأفه بيدۊن ˇ اينکي مجبۊر ببه خۊ مۊشکيل ؤ احسأسأ وأگۊيأ بۊکۊنه.

زأکأنأ فيت دأن به نقل گؤفتن, ويشتر اۊشأن ˇ نقأشي-يأن ˇ مرأ ايتفأق دکفه. ويني کأت ⁴(1971) أ رأيأ ايخترأع بۊکۊده کي أن ˇ نأم ايسه « نقأشي-بأزي بچمسته خطأن ˇ مرأ يأ خط-خطي نقأشي ⁵ » . ألبت گأگلف خأيلي سأدده زأکأن ˇ جأ خأييدي کي دأستأن چأکۊنيد. آليس ابرهأرت ⁶(1979) گۊرۊيي نقل گؤفتنأ خأنوأده-درمأني نيشتأن ˇ دۊرۊن, پيش-دبستأني زأکأن ˇ ره ايستفأده بۊکۊده دأره.

چۊتؤيي نقل گؤفتن, هرتأ دأنشمند ؤ درمأنگر ˇ دۊرۊن مۊمکينه فرخ بۊکۊنه, أممأ أصلي هدف, همه-تأ رأئأن ˇ دۊرۊن ايتأيه ⁷.

ئي جرگه دئه روأنشنأسأن کي نقل گؤفتنأ آمؤختن ˇ ره بکأرأ گيريدي, اعتقأد دأريدي کي زأکأن ˇ تخيؤل, آمۊزش ˇ قوي-ترين أبزأره. تخيؤل ˇ مأله, کأرأن ؤ بأزي-يأن ˇ دۊرۊن, بۊخۊصۊص خييألي دأستأنأن ˇ دۊرۊن, کأميلن مألۊمه. أ رأيي کي نقل گؤفتن ˇ مرأ ايچي آمؤجيدي دۊرۊن, حق ˇ سأى کۊنيدي کي معلمأنأ کۊرکۊر بديد کي درسأنأ دأستأنأن ˇ مأنستن بأمؤجأنيد ؤ اۊ مأله-يي کي زأکأن ˇ سر نهه جأ ايستفأده بۊکۊنيد, تأ درسأنأ بئتر زأکأنأ حألي بۊکۊنيد. أ رأ, نقل گؤفتن ؤ تفريح, تيتألأ بؤستن ؤ شأدي-يأ کلأس ˇ ره سؤغأت أوره.

کى رن اگان ⁸(1994) « نقل گؤفتن ˇ مرأ درس دأن ˇ» کيتأب ˇ دۊرۊن, عۊلۊم, رييأضي, ايجتمأعي عۊلۊم, کلأمي هۊنرأن ؤ أشأن ˇ مأنستن موأدأ, نقل گؤفتن ˇ قألب ˇ دۊرۊن طرأحي بۊکۊده.

اۊ خلأق ˇ آدمأني کي خۊشأن ˇ زيويش ˇ تأريخچه-يأ بينيويشتده, پري-يأن ˇ دأستأنأن ˇ نقش, جغلأن ˇ فأنتزي تجرۊبه ؤ أدبييأتأ خۊشأن ˇ پيشرفتأن ˇ دۊرۊن مۊهيم دأنيدي ⁹. هرچن أسأ تکنؤلؤژي رؤشد بأعيث بؤبؤسته کي ايتأ بأر ˇ نوأر, چي صؤتي چي تصويري, نقلأن ˇ جأ تؤليد ببه, أممأ وأ اعترأف کۊدن کي هيدأنه اۊشأن, آمؤختني هدفأني کي رۊبرۊ نقل گؤفتن ˇ دۊرۊن نهأيأ, نأريدي.

نقل گؤفتن ˇ أصلي نؤکته, ارتبأطي ايسه کي نقل-گۊ ؤ اۊني کي ايشتأوه مييأن به وۊجۊد أيه. ايجۊر کي بۊگؤفته به: « نقل گؤفتن ˇ مؤقه, ايتأ دۊجأنبه خلق کۊدن ˇ مؤقه-يه. هر دۊ نفر ايتأ کؤگأيأ خلق کۊنيدي کي کلمه-أن ؤ تخيؤل ˇ سر بينأ بؤبؤسته دأره ¹⁰. » نقل-گۊ ايتأ شفأيي نقل ˇ مرأ, اۊشأني کي کرأ نقلأ ايشتأويدي ره, ذهني تصوير چأکۊنه. هأتؤ کي زأى نقلأ ايشتأوه, صحنه-أن ؤ دأستأن ؤ اۊن ˇ شخصييتأن ˇ کرد ˇ کأرأنأ خلق کۊنه.

تصويرسأزي توأنأيي ؤ تخيؤلي کي خلأقييت ˇ سر بينأ بؤبؤسته دأره, اۊن ˇ دۊرۊن وأج أيه. تخيؤلأ, خلأقييت ˇ پأيه ؤ أسأس دأنيدي؛ چۊنکي « هر چيزي-يأ هۊتؤيي کي آشکأرأ بؤسته – چي وأقييت ˇ دۊرۊن چي هپرأ دۊرۊن- دۊمرتبه خلق نۊکۊنه. وختي کي تخيؤل کرأ کأر کۊنه, وأقييتأ ايجۊر ديگه شکل ديهه. وختي اينفر أن همه شکل ˇ دۊرۊن ايتأ يأ چنتأ شکلأ دؤجين کۊنه ؤ اۊنأ به تنأ گيره, شأ گؤفتن, وأقييتأ أرۊ اۊرۊ بۊکۊده دأره ¹¹. »

دأستأنأن, بۊخۊصۊص تخيؤلي يأ عيلمي-تخيؤلي دأستأنأن, تخيؤل ˇ قؤدرت ˇ ره يأ تأزه چي-يأنأ وأمختن يأ وأمختن ˇ حسأ فيت دأن ˇ ره تأنيدي خؤرم-چي بيبيد. « تخيؤلي دأستأنأنأ به جأ ايستفأده کۊدن, هم تأنه دأنش آمؤزأن ˇ آينده حسأ پۊربأرترأ کۊنه, هم تأنه اۊشأن ˇ تخيؤلأ وأج بأوره ؤ اۊشأنأ بأل بزنه کي خۊشأن ˇ توأنأيي-يأ تغييرأن ˇ دۊرۊن بۊجؤر ببرد ¹². »

ايتأ عأليمي رأ نهأ کي زأکأنأ فيت بديم کي خلأق ˇ حق ˇ سأى بدأريد, دأستأن ؤ نقل گؤفتن ˇ مأنستن. ايتأ أ رأئأن نقلأني ايسيد کي نيصف ˇ کأره-ييد ؤ زأکأن وأ اۊنأ تۊمأنأ کۊنيد. يأ بيدۊن ˇ ايسم ˇ نقلأن کي زأکأن ˇ جأ بخأييم اۊشأن ˇ ره ايسم دؤجين بۊکۊنيد. يأ زأکأنأ خلأق ˇ نمأيشأن ˇ دۊرۊن ببريم کي دأستأن چأکۊنيد, يأ نقأشي ؤ تصوير چأکۊدن دأستأنأن ˇ ره, کي أن ˇ پسي اۊشأنأ وأشکأفيمي.

خلأقييت ˇ وأج أوردن ˇ دأب, نقل گؤفتن ˇ مرأ

الکس اسبوران کي خلأقييت ˇ زيمينه دۊرۊن صأحيب ˇ نظر ايسه ؤ خلأقييت ˇ آمؤختن ˇ بۊنيأد ˇ رئيسم ايسه گه: « أگه خأييم پأچ ˇ دأستأنأن ˇ جأ, خلأقييت ˇ ويشتري-تمرينأ بدس بأوريم, وأسي حق ˇ سأى بۊکۊنيم دأستأن ˇ أولي پلک ˇ خأندن ˇ مرأ, آخري پلک ˇ سر فيکر بۊکۊنيم ؤ ايتأ تأزه-دأستأن أمه ره بينيويسيم کي ايتأ خؤرم-چي اۊن ˇ جأ خلق بۊکۊنيم ¹³. »

پيشنهأد به کي ايتأ پلک, ايتأ پأچ ˇ دأستأن ˇ جأ کي زأکأن اۊن ˇ مرأ آشنأ ني-ييدأ, اۊشأن ˇ ره بخأنيد بزين وختي کي ايتأ شخصييت دأستأن ˇ دۊرۊن مۊعرفي بؤبؤسته يأ ايتأ ايتفأقي دکفته, اۊشأن ˇ جأ بخأييد ايتفأقأني کي مۊمکينه أن ˇ پسي دکفه-يأ پيشگۊيي بۊکۊند. أ تمرين ˇ پسي, زأکأن وأ کۊجي جرگه-أن ˇ دۊرۊن, خۊشأن ˇ نظرأ أ دأستأن ˇ تۊمأنأ بؤستن ˇ جأ بيگيد ¹⁴.

اى. پال تۊرنس کي خلأقييت ˇ زيمينه دۊرۊن ايتأ پيلدأنه محقق ايسه, ايشتأو ديهه کي نقل گؤفتن ˇ پسي, زأکأن ˇ جأ بخأييد أصل ˇ مطلبأ ايتأ تأتأيي, ايتأ شئر يأ شۊعأر, ايتأ تم يأ ايتأ ذهني علأمت ˇ جأ خۊلأصه بۊکۊند.

ايتأ رأى ˇ ديگه أن ˇ کي زأکأنأ فيت بديم کي نقل ˇ مۊشکيل ˇ ره ايتأ خؤرم رأى ˇ حل بييأفيد. ايتأ رأى ˇ ديگه کي تۊرنس ايستفأده بۊکۊده دأره أن ˇ نأم ايسه « جأدۊيي تۊر » . زأکأنأ مۊشمأيي تکسأ-بؤسته تۊر فأديم ؤ اۊشأن ˇ جأ خأييم کي خۊشأنأ هر کس يأ هر چي کي أشأن ˇ ديل خأيه جأ جزنيد ؤ اۊن ˇ نقشأ بأزي بۊکۊنيد. بأزۊن, همه-دأنه, اۊ نقشأني کي هۊنرپيشه-أن جأدۊيي تۊر ˇ ره دؤجين بۊکۊده دأريد ˇ مرأ, ايتأ دأستأن چأکۊنيد ¹⁵.

ماري آن پأئؤلين (1995) « جغلأن ˇ أدبييأت ˇ خلأق ˇ کأربۊردأن ˇ» کيتأب ˇ دۊرۊن چن-جۊر بأزي, أنگۊشتأن ˇ مرأ بأزي, اينفر ديگر ˇ نقشأ بأزي کۊدن, لأل بأزي ؤ أشأن ˇ مأنستنأ مۊعرفي کۊنه کي ايتأ بأر ˇ آمؤختن-چيزأن أشأن ˇ دۊرۊن دره. اۊن خۊ خلأقأنه نيويشتن ˇ أولي تجرۊبه دۊرۊن, پيشنهأد کۊنه کي زأکأن ˇ جأ بخأييد هرتأ, ايتأ رأ دؤجين بۊکۊنه کي اۊن ˇ مرأ بشه ايتأ خييألي سأمأن ˇ دۊرۊن. بزين, تصميم بيگيره کي أ جأدۊيي سأمأن ˇ دۊرۊن, خأيه چي شخصييتي بدأره. أ دأستأن ˇ چأکۊدن ˇ مرحله-أن أتؤييد:

1. دأستأن ˇ شخصييتأنأ خلق کۊدن
2. کأرأني کي شخصييتأن وأ بۊکۊنيد
3. جأئأني کي شخصييتأن خأييد بيشيد
4. ايتفأقأن أکه دکفه . . .

تۊمأم ˇ أ مرحله-أن ؤ مأجرأئأن جأدۊيي سأمأن ˇ دۊرۊن ايتفأق دکفه ؤ وختي کي زأکأن, ايوأردئم وأگرديدي وأقيي دۊنيأ دۊرۊن, اۊ بأمؤخته-چيزأني کي أ تجرۊبه ؤ شنأخت ˇ مرأ بدس بأورديدي جأ, تأنيدي ايتأ کأميل ˇ دأستأن چأکۊنيد ¹⁶.

ايتأ دئه رأ کي تأنه خلأقييتأ وأج بأوره, دأستأنأني ايسه کي نيصف ˇ کأره-يه ؤ أشأن ˇ آخرم مألۊم ني-يه چي به. تۊرنس تأکيد کۊنه کي ايتأ رأيي کي مسئله-أنأ خلأقأنه حل کۊنه, أن ˇ کي کيتأبأن ؤ دأستأنأني جأ ايستفأده بۊکۊنيد کي اۊن ˇ آخر مألۊم ني-يه چي به. اۊن گه:

« من . . . ايتأ نقل زأکأن ˇ ره گم, بزين اۊشأن ˇ جأ خأيم اۊ چيزأني کي اۊشأن دۊس دأشتيد بدأنستي-بيد أممأ نقل ˇ دۊرۊن دينه-بۊ سر فيکر بۊکۊنيد, بأزۊن اۊشأنأ فيت دهم خۊشأن ˇ وأورسئن چي-يأنأ مرأ بيگيد ¹⁷. »

ايتأ دئه رأ أن ˇ کي اۊشأن ˇ جأ بخأييم چنتأ چيز ˇ دۊچکأنئن ˇ مرأ, ايتأ دأستأن چأکۊنيد.

ايتأ دئه رأيم أن ˇ کي زأکأنأ فيت بديم دأستأن ˇ جأ نقأشي بکشد. تۊرنس, تمرينأني کي اۊن ˇ ايسم ايسه « أسأ خييأل بۊکۊنيد ˇ» دۊرۊن ايتأ خۊشگيل ˇ چۊم-دکف زأکأنأ نيشأن ديهه ؤ اۊشأن ˇ جأ خأيه کي خييأل بۊکۊند اۊ دۊرۊن ايسأده. بزين أ تجرۊبه جأ ايستفأده بۊکۊند دأستأن نيويشتن ˇ ره. بأزۊن اۊشأن ˇ جأ خأيه اۊ ايتفأقأني کي دکفته جأ ايتأ خۊشگيل ˇ نقأشي بکشد, يأ ايتأ گئشه زوأن ˇ جأ ايتأ نقل گه, بزين اۊشأن ˇ جأ خأيه اۊ گئشه زيويش ˇ اۊ قسمت کي ويشتر أشأن ˇ ديلأ بيگيفته جأ ايتأ نقأشي بکشد.

هأتؤ, تأنيم زأکأن ˇ جأ بخأييم کي خۊشأن ˇ تجرۊبه-أن ؤ ايتفأقأني کي هر رۊز أشأن ˇ ره دکفه جأ نقل بيگيد بزين هر کس, نقل ˇ ايتأ پلکأ بکشه. مۊربي تأنه زأکأن ˇ بکشئکأنأ به هم دۊچکأنه. أ کأر بأعيث به « زأى خۊ مرأ بگه کي منم تأنم نقل بگم ؤ هأيأيه کي خۊ ذهنأ بره تخيؤل ؤ فيکر کۊدن ؤ خلأقييت ؤ نقل چأکۊدن ˇ ور ¹⁸. » ويشتر ˇ هۊنري مۊربي-يأن ؤ صأحيب نظرأن پيشنهأد کۊنيدي کي نقأشي, نقل ˇ مرأ همرأ ببه. . جأن لينکستر گه:

« من أن ˇ وأسي کي کۊجدأنه, جوأن يأ پيلدأنه دأنش-آمۊزأنأ فيت بدنم خلأق ˇ هونري کأرأن ˇ ور, نقلأن ˇ جأ ايستفأده بۊکۊدم. » نقل گؤفتن ايجۊر سرگمج-گيري-يه. أممأ دأستأن ˇ دأب, هۊ مؤقه, اۊنچي کي بۊگؤفته-به مرأ, هيجأني-تره... أن ˇ دأب أتؤيه:

1. تأ وختي کي نقل کرأ بۊگؤفته به اۊنأ بکشيد
2. ايتأ يأ چنتأ وسيله يأ موأد ˇ مرأ بکشيد
3. تأ نقل تۊمأنأ به, شيمي کشئنأ درأزه بديد ¹⁹.

اۊن, نقأشي-يي کي دأستأن ˇ سر بکشه به-يأ ايجۊر تجرۊبي نقأشي دأنه. اۊن ˇ نظر, تجرۊبي نقأشي کۊدن, ايبتکأري علأمتأني ايسه کي کأغذ ˇ سر أيه ؤ خلأق فيکر کۊدنأ زأکأ آمؤجه.

ايتأ معلمأني کي هۊنر ˇ دۊرۊن پۊر سأبقه دأره, ايشتأو ديهه کي معلم وأ يک سأعت خۊ وختأ بنه کيتأب ؤ نقلي کي زأکأن دۊس دأريدي-يأ بخأنه ؤ نقل ˇ خأندن ˇ پسي زأکأن ˇ جأ بخأيه اۊ قسمتي کي ويشتر دۊس دأريدي-يأ بکشد ²⁰.

ايتأ رأى ˇ ديگه, زأکأن ˇ گبأن ˇ جأ خأندني موأد چأکۊدنه. أتؤيي کي مۊربي نقلأني کي زأى گه-يأ خۊ جۊمله-أن ˇ مرأ, هۊ مؤقه, ايتأ کأغذ ˇ سر بينيويسه ؤ اۊن ˇ ره بخأنه. أ رأ دۊرۊن پيشنهأد به کي وهأليد زأکأن آزأت ببد ؤ بيدۊن ˇ ترس, گب بزند؛ چۊنکي أ کأرأن خلأقييت ˇ جۊلؤيأ گيره ²¹.

تۊمأم ˇ رأئأني کي بۊگؤفته بؤبؤسته-يأ خأيلي رأحت مدرسه يأ خأنه دۊرۊن شأ أنجأم دأن. مۊهيم-ترين مؤضۊ أن ˇ کي أ کأرأن ˇ أنجأم دأن ˇ مؤقه, نۊکۊنه ايوأر زأکأن ˇ جأ اينتقأد بۊکۊنيد يأ اۊشأن ˇ گبأنأ بيجير بۊجؤر بۊکۊنيد ؤ اۊشأنأ وأدأريد کي رقأبت بۊکۊنيد. هأتؤ, زأکأن وختي کي کرأ خلأق ˇ حق ˇ سأيأن کۊنيدي, مأددي جأيزه نخأييدي. هأن وسته کي أشأن ˇ تأزه ؤ ايبتکأري ايده-أنأ بأل بزنيد ؤ شيمي حوأس بمأنه کي نقلأن, أشأن ˇ سلأمأل ببه.

دنلود فايل PDF این مقاله

غيضي کي أفسأنه-أن ˇ دۊرۊن دره

برؤنؤ بتلهأيم

فأرسي وأگردأن: شقأيق قندٚهأري

گيلکي وگردأن: نيمأ رهبر

غيض, جغلأن ؤ زأکأن ˇ کيتأب ˇ دۊرۊن, تأريخي سأبقه دأره. أ مؤضۊ, قرن ˇ نۊزدهؤم ˇ آخر آخرأن ؤ قرن ˇ بيستۊم ˇ أول أولأن, دأب بؤبؤسته. اۊ مؤقه کأرشنأسأن ؤ صأحيب نظرأن گؤفتيدي کي, عأمييأنه نقلأن ؤ أفسأنه-أن ˇ غيض خأيلي زييأده. اۊشأن ˇ قؤلي أجۊر چي-يأن زأکأن ˇ غيضأ پئر ؤ مأرأن ˇ جأ زييأدأ کۊنيدي يؤ ؤ أ احسأسأنأ بأل زئن بأعيث به کي جغلأن ˇ دۊرۊن احسأس ˇ بدي به وۊجۊد بأيه. أممأ حئيقت, أول-نفر« برؤنؤ بتلهأيم» – اۊتريش ˇ پيلدأنه روأنشنأس- بۊ کي ايتأ کيتأب ˇ دۊرۊن به ايسم ˇ« کاربردهاى افسون ˇ» دۊرۊن, ايجۊر دئه مسئله-يأ فأندرسته ؤ اۊنأ وأشکأفته.

اۊ وخت ˇ پسي کي جغلأن ˇ روأنشنأسي ؤ روأنکأوي تأزه وأرسي-يأن نيشأن بدأ کي ايتأ جغله ذهن ؤ اۊن ˇ تخيؤل ˇ دۊرۊن چنقدر غيض دره, نأ آرأم ايسه ؤ منفي يؤ حتتأ مضرته, أفسأنه-أن ؤ عأمييأنه نقلأنأ بدجۊر بۊکؤبستيدي. مثن ايتأ جغله چۊتؤ خۊ پئر ؤ مأرأ تۊقأيه, هۊتؤيم تأنه بعضي-تأ مؤقه-أن اۊشأن ˇ جأ اۊنأ مرأغأ گيره.

پس شأ گؤفتن, أفسأنه-أن, جغله رۊحي يؤ روأني زيويشأ نظأره شه. حئيقت أن ˇ کي أگه جغله أ نقلأن ˇ مرأ آشنأ ببه ؤ أشأنأ بخأنه, اۊن ˇ رۊح ؤ روأن ˇ سر مأله نهه. هأن ˇ وأسي, بعضي-يأن بأور دأريدي کي أجۊر نقلأن, جغلأن ˇ نأخۊشي احسأسأني کي پۊر درد ؤ رنج ايسيدأ فيت ديهيدي.

اۊشأني کي ونأشتيد جغلأن قديمي يؤ سۊنتي نقلأنأ وأخأنيدي, آخربسره به أ نتيجه فأرسيدي کي حتتأ أگه جغلأن ˇ تأزه دأستأنأن ˇ دۊرۊن, خييألي شخصييتأن, ديو ؤ يۊهأ مأنستن دبه, اۊ شخصييت حؤکمن وأ مئروأن ؤ دۊس-دأشتني ببه. أممأ حئيقت أن ˇ کي أشأن, ايتأ مۊهيم ؤ أسأسي نؤکته-يأ جخترأ دأييد؛ يۊهأ ؤ ديوي کي زأکأن ايوأر ايوأر اۊنأ خۊشأن ˇ دۊرۊن حس کۊنيدي يؤ همه-کس ˇ جأ پيشتر اۊن ˇ مرأ سر ؤ کأر دأريدي, هۊ ديوي ايسه کي اۊشأن ˇ دۊرۊنأ کرأ خۊره ؛ چۊنکي زأکأن, گأگلف خۊشأنأ وختي کي ايتأ احسأس ˇ نأخۊشأيند دأريدي ايتأ وحشتنأک ˇ غۊل دينيدي کي همه-کس ˇ جأ ويشتر اۊشأنأ أذئت کۊنه.

أسأ, أگه أ يؤهأ, اۊن ˇ نأخۊدآگأ دۊرۊن جۊخۊسه ؤ بيرۊن نأيه, جغله نتأنه اۊنأ بشنأسه ؤ هيچ مؤقه نتأنه اۊن ˇ مرأ آشنأ ببه. أممأ أگه جغله, أفسأنه-أن ؤ اۊشأن ˇ فأنتزي يؤ خييألي کۊگأ مرأ آشنأ ببه, اۊن ˇ ذهن ؤ تخيؤل ˇ قؤدرت وأج أيه ؤ تأنه اۊنأ خۊ مرأ ايجأنأ بۊکۊنه. جغله أگه أجۊر أفسأنه-أن ؤ نقلأنأ نخأنه ؤ وأگۊيأ نۊکۊنه, نتأنه خۊ خييألي يۊهأيأ بشنأسه ؤ رأيي کي بتأنه اۊنأ سر ببه-يأ نييأفه.

أجۊر مؤقه-أن, جغله اضطرأب ؤ نيگرأني زييأدأ به ؤ گير دکفه. قديمي ؤ عأمييأنه أفسأنه-أن ˇ ايشنأختن, اۊن ˇ ذهن ˇ اضطرأب ؤ نيگرأني-يأ ايتأ خؤرم قألب ؤ فؤرم دهه ؤ آخربسره, أ ديوأ چۊتؤ سر بؤستنأ, اۊنه آشکأرأ کۊنه. اۊشأني کي کؤللن ونأليدي زأکأن قديمي أفسأنه-أن ؤ نقلأنأ بخأنيد, ايدعأ کۊنيدي کي أگه أفسأنه-يي غۊلأن ؤ ديوأنأ جيگأ بدد, جغله نأخۊدآگأ, تأنه اۊن ˇ ذهن ؤ عقلأ طبيعي وأج بأوره ؤ بيلکؤل, أجۊر چي-يأن أگه بئسيد, ونأليدي زأک ˇ ذهن دۊرۊس وأج بأيه.

أ آدمأن ˇ نظر أن ˇ کي, عقلأني« من» وأسي هۊ جغلگي زمأت پيله-أ به! هأن ˇ وأسي, نوأسي جغله« نهأد ˇ» جۊخۊفته چۊمأرأن, بيدأرأ به. پس, وأسي هۊ أول-سر ونأليم جغله خۊ نأخۊدآگأ جأ وأخبأ به ؤ نقلأني کي اۊن ˇ نأخۊدآگأيأ وأخبدأرأ کۊنيدي-يأ اۊن ˇ جأ جيگيريم.

شأ أتؤ گؤفتن کي جغله وأ خۊ بدگيل ؤ هأچينه خييألأنأ سرفۊکؤ بزنه ؤ خألي خؤرم خييألأن ˇ جأ کئف بۊکۊنه. أممأ حئيقت أن ˇ کي نظرأني کي« نهأدأ» سرفۊکؤ زنيدي, عمل ˇ دۊرۊن بقأيده بکأرخؤر ني-ييدي. اۊ وخت کي جغله مجبۊرأ به خۊ نأخۊدآگأ ضميرأ سرفۊکؤ بزنه چي ايتفأقي دکفه؟

أ نۊمۊنه-يأ فأندريد:

پسر زأکي کي خۊ درمأن ˇ دؤره-يأ تۊمأنأ کۊده پس, کي خأيلي-يم طۊل ˇ درأزه دأشتي, يؤکؤ دۊکۊشسته بۊ, أن ˇ دليلأ أتؤ وأگۊيأ بۊکۊده:

« چۊنکي نأمؤخته-گبأن بزه بۊم, مي مأر مي دهنأ صأبۊن ˇ مرأ بۊشؤسته. من قۊبۊل دأرم کي مي گبأن نأمؤخته-گب بۊ, أممأ اۊن نأنستي کي اۊ وأژه-أن ˇ شؤستن ˇ مرأ, خؤرم گبأن ؤ خؤرم کلمه-أنم فۊشؤرده» .

يني, نأخۊدآگأ ضمير, بۊنيأدي يؤ خأم ˇ موأد ˇ چۊمأره, کي اۊن ˇ سر,« من» , أمي شخصييتأ ديچين وأچين کۊنه. چۊنکي, أفسأنه-أن هۊ طبيعي منبعأن ؤ ذخيره-أني ايسيدي کي أ موأدأ تأمين کۊنيدي يؤ اۊنأ سر ؤ شکل ديهيدي ؤ آخربسره, اۊ وظيفه-أني کي« من» اۊشأن ˇ مرأ شخصييتأ چأکۊنه سر, مأله نيهيدي. أگه أ طبيعي منبع-يأ أمي جأ جيگيرد, أمي زيويش لأتوأرأ به ؤ دئه تخيؤل ؤ رؤيأيي نمأنه کي أمرأ« نأجه» بدنه.

پس, أمي زۊر فأنرسه کي بتأنيم زيويش ˇ مۊشکيلأن ؤ اۊن ˇ جير ؤ جؤرأن ˇ مرأ کله به کله بيبيم. أ خييألي ؤ رؤيأيي کؤگأ وأج أوردن ؤ آمؤجئن ˇ مؤقه, هۊ جغلگي زمأته. أنم بيگيم کي أمأن أمي زأکأن ˇ خييألي يؤ فأنتزي کؤگأيأ چن جۊر ديگرم تأنيم وأج بأوريم ؤ حتتأ اۊشأنأ فيت بديم کي أ خييألي يؤ أفسأنه-يي کؤگأ لبله-يأ بيگيرد. ايتأ أ رأئأن, أن ˇ کي زأکأنأ فيت بديم« نقأشي» بکشد! أمأن أمي زأکأنأ گيمي هرچقد دۊس دأريدي تأنيد نقأشي بۊکۊنيد ؤ حتتأ« دأستأن» چأکۊنيد.

أممأ وختي کي زأکأن أمي خييألي کؤگأ مۊشترک ˇ ميرأث ˇ (عأمييأنه أفسأنه-أن ؤ نقلأن) مرأ شنأس ني-ييدي, أگه زيويش ˇ مۊشکيلأن ˇ دۊرۊن گير دکفيد نتأنيد دأستأني خلق بۊکۊنيد کي اۊشأنأ کۊمک بۊکۊنه. أ تألأن تألأني دۊرۊن, جغله, خألي تأنه نقلأني بگه کي اۊن ˇ نيگرأني يؤ نأجه-أنأ ربط دأره.

هرچن کي روأن-مجأن, نأخۊدآگأ ضمير ˇ جأ – بۊخۊصۊص زأکأن ˇ نأخۊدآگأ ضمير ˇ جأ- خأيلي چيزأن آشکأرأ کۊديد, بعضي-يأن هأني أفسأنه-أن ˇ نخأندن ˇ ره دليل أوريدي. اۊ وخت کي دئه کسي نتأنسته جغله جۊلف ˇ کشمکشأنأ, يأ اۊ نيگرأني-يأن ؤ غيضي کي اۊن ˇ خأسته-أن ˇ دۊرۊن دۊبۊيأ جيگأ بده, أ آدمأن أتؤ نتيجه بيگيفتدي کي:

« أن ˇ وأسي کي أ بچک وأچک ˇ دۊرۊن جغله خأيلي چيزأن ˇ جأ ترسه, وأسي اۊنأ هرچي کي ترسنأک به نظر أيه جأ, دۊرأ کۊدن» .

اۊ جغله-يي کي أفسأنه-أنأ شنأسه ره, مأمۊلي نقلأني کي ترسنأک به نظر أييدي, أشأن ˇ ترسنأکي ايپچه ايپچه کأسأ به. بزين نأرأحتي يؤ نيگرأني-يي کي اۊ أول-سر, نقل ˇ ول بيگيفته فضأ جأ به وۊجۊد بأمؤ بۊ, آرأمش ؤ رضأ مرأ عوض-دکشأ به. چۊنکي جغله تأنه بأزي-يي کي أفسأنه خأندن ˇ جأ بأمؤخته مرأ, عأقيلأنه ؤ مۊنأسب, دأستأن ˇ مۊشکيل ˇ مرأ کنأر بأيه.

پئر ؤ مأرأني کي خۊشأن ˇ زأکأن ˇ ترسنأک ˇ فيکرأن ؤ تۊندي-يأ جيگأ ديهيدي, اعتقأد دأريدي کي أشأن ˇ جغله هيچ جۊره نوأ أ فضأئأن ؤ فيکرأنأ درگيرأ به (بخألي همچين چيزي ايمکأن دأره!) وختي کي زأى فأنتزي يؤ أفسأنه-يي نقلأنأ نخأنه, احسأس کۊنه کي اۊن« تنأ» کسي ايسه کي أجۊر نظر ؤ فيکر دأره ؤ هأن, بأعيث به کي اۊن ˇ خييألي يؤ ذهني کؤگأ, رأسي رأسي ترسنأکأ به.

أممأ, أگه وأخبأ به کي, ايسأييدي کسأني کي اۊن ˇ مأنستن تخيؤلي کؤگأ دأريدي, بأعيث به کي احسأس بۊکۊنه اۊنم أ پيلدأنه کؤگأ ايتأ پرکأله-يه ؤ ترس ؤ سفيأن کۊدني کي خۊ بد ؤ هأچينه فيکرأن ˇ جأ دأره, کأسأ به.

أفسأنه-أن ؤ عأمييأنه نقلأن, جغله تخيؤل ˇ قؤدرتأ فيت دهه ؤ اۊنأ دۊرۊس وأج أوره. تجرۊبه نيشأن بدأ دأره, زأکأني کي خؤرم تخيؤل دأريدي (چۊنکي أفسأنه-أن ؤ اۊشأن ˇ کرد ˇ کأرأنأ بخأنده ؤ بيده دأريدي) فئلمأني کي غيض ˇ جأ بتپسته-يه دئن ˇ مؤقه, أشأن ˇ کرد ˇ کأر عأقيلأنه-تره.